អង្គរដែល​ជា​បុរាណ​ដ្ឋាន​ធំ​មួយ​នៅ​លើ​លោក ​ត្រូវ​បាន​ទទួល​ចំណាត់​ថ្នាក់​ក្នុង​បញ្ជី​បេតិកភណ្ឌ​ពិភព​លោក​ នៃ​អង្គការ​យូណេស្កូ​នៅ​ចុង​ឆ្នាំ​ ១៩៩២ ក្រោយ​ពី​បាន​ទទួល​ការ​អំពាវនាវ​ពី​សំណាក់​ព្រះករុណា​ព្រះ​បាទ​សម្តេច​ព្រះ​នរោត្តម​សីហនុ​ ដែល​កាល​នោះ​ព្រះអង្គ​ធ្វើ​ឡើង​ក្នុង​ឋានៈ​ជា​ព្រះ​ប្រធាន​នៃ​ក្រុម​ប្រឹក្សា​ជាតិ​ជាន់​ខ្ពស់​ ។

តាំង​ពីនោះ​មក​ គេ​បាន​បង្កើត​គណៈកម្មាធិការ​អន្តរជាតិ​មួយ​ (គណៈកម្មាធិការ​អន្តរ​ជាតិ​ដើម្បី​សម្រប​ សម្រួល​កិច្ច​គាំ​ពារ​ និង​អភិវឌ្ឍន៍​រមណីយ​ដ្ឋាន​ប្រវត្តិ​សាស្ត្រ​អង្គរ ហៅកាត់​ថា​ ICC) ដើម្បី​សម្រប​សម្រួល ​រាល់​ការ​ងារ​សំខាន់​ទាំង​ឡាយ​ណាពាក់​ព័ន្ធ​នឹង​ រមណីយដ្ឋាន​នេះ ។

គប្បី​កុំភ្លេចថា​ អត្ថបទ​នីតិក្រមមុន​គេបង្អស់​ ដែល​ព្រះករុណា​ជា​អម្ចាស់​បាន​ឡាយ​ព្រះហស្ថ​លេខា​ បន្ទាប់​ពីឡើង​គ្រង​រាជជា​ថ្មី​ភ្លាម​ គឺព្រះរាជក្រឹត្យ​ស្តី​ពីការ​កំណត់​តំបន់​សៀមរាប​-អង្គរ​ ។ នេះ​ស​ឲ្យឃើញ អំពី​សារសំខាន់​បំផុត​នៃ​កិច្ច​ការពារ​ និងអភិវឌ្ឍន៍​តំបន់​នេះ ។ រាជរដ្ឋាភិបាល​កម្ពុជា​ ត្រូវ​បំពេញ​កាតព្វកិច្ច​ ចំពោះ​មុខ "គណៈកម្មាធិការ​បេតិកភណ្ឌ​ពិភពលោក​" ពោល​គឺបង្កើត​ស្ថាប័ន​ជាតិ​មួយ​ដែល​ជា​បណ្តាញ​នៃ​ សមត្ថកិច្ច​​​ផ្សេងៗ​ ទាក់ទង​នឹងការគ្រប់គ្រង​តំបន់​សៀមរាប-អង្គរ​ទាំង​មូល ។ ក្នុង​ន័យ​នេះហើយ​ដែល​ អាជ្ញាធរ​អប្សរាត្រូវបានបង្កើតឡើងនៅខែកុម្ភៈ ឆ្នាំ១៩៩៥ ។

រចនាសម្ព័ន្ធ

អគ្គនាយកដ្ឋាន​នៃ​អាជ្ញាធរ​អប្សរា ស្ថិតក្រោម​ការ​ដឹកនាំ​របស់​ប្រធាន​អាជ្ញាធរ​អប្សរា​ និងមាន​អគ្គនាយក​ជា​ជំនួយ​ការ​ទទួល​ខុស​ត្រូវ​ក្នុង​ការ​អនុវត្ត​ភារកិច្ច​ ទូទៅ​របស់​អគ្គនាយកដ្ឋាន​នៃ​អាជ្ញាធរ​អប្សរា​ អម​ដោយ​អគ្គនាយក​រង​មួយ​ចំនួន​តាម​ការ​ចាំ​បាច់។ អគ្គនាយកដ្ឋាន​នៃ​អាជ្ញាធរ​អប្សរា​មាននាយកដ្ឋាន ដូចខាង​ក្រោម :
- នាយកដ្ឋាន​រដ្ឋបាល បុគ្គលិក និងសម្ភារៈ
- នាយកដ្ឋាន​ហិរញ្ញកិច្ច​ និងគណនេយ្យ
-នាយកដ្ឋានផ្សព្វផ្សាយ
-នាយកដ្ឋាន​ទ្រទ្រង់បចេ្ចកទេស​ និង​គម្រោង​អន្តរវិស័យ
-នាយកដ្ឋាន​អភិរក្ស​ប្រាសាទ​ក្នុង​ឧទ្យាន​អង្គរ និង​បុរាណ​វិទ្យាបង្ការ
-នាយកដ្ឋាន​អភិរក្ស​ប្រាសាទ​ក្រៅ​ឧទ្យាន​អង្គរ
-នាយកដ្ឋាន​អភិវឌ្ឍន៍​ទេសចរណ៍​អង្គរ
-នាយកដ្ឋាន​រៀបចំ​ដែនដី​ និង​គ្រប់​គ្រង​លំនៅ​ដ្ឋានក្នុង​ឧទ្យាន​អង្គរ
-នាយកដ្ឋាន​អភិវឌ្ឍន៍កសិកម្ម និង​សហគមន៍
-នាយកដ្ឋាន​គ្រប់​គ្រង​ទឹក
-នាយកដ្ឋាន​គ្រប់​គ្រង​ព្រៃ​ឈើ ទេសភាព​វប្បធម៌ និងបរិស្ថាន
-នាយកដ្ឋាន​អភិវឌ្ឍន៍​វប្បធម៌ សារមន្ទីរ​​និងបទ​ដ្ឋាន​បេតិកភណ្ឌ
-នាយកដ្ឋាន​អភិវឌ្ឍន៍​បេតិកភណ្ឌ​ក្រុងក្នុង​តំបន់​សៀមរាប
-នាយកដ្ឋាន​សណ្តាប់ធ្នាប់​ និងសហប្រតិបត្តិការ

- ខាងជើង​រង្វង់​មូល​ផ្លូវ ៦០ ម៉ែត្រ ជាប់នឹងសារមន្ទីរ​ព្រះនរោត្តម​សីហនុ-អង្គរ ខេត្ត​សៀមរាប
ទូរស័ព្ទ : ០៦៣​ ៦៣ ០០០ ១២